FUTURE GREENLAND 2013-mut 6.-7. februar Nuummi pisussamut tikilluarit
Kalaallit Nunaanni Sulisitsisut Peqatigiiffiat (GA) inuussutissarsiorneq pillugu pingajussaannik ataatsimiitsitsissaaq, tamatumani siunertarineqarluni inuussutissarsiorneq pillugu isumassarsiornissaq ineriartortitseqataanissarlu. Kalaallit Nunaanni Sulisitsisut Peqatigiiffiata inuussutissarsiorneq pillugu ataatsimiititsinerani qulequtaritinneqartartut pinerit tamaasa allanngorartinneqartarpoq. Qulequttanik toqqaanermigut Kalaallit Nunaanni Sulisitsisut Peqatigiiffiata anguniarpaa ilisimasat suleqatigineqarsinnaasullu pingaarutillit pissarsiarinissaannik qulakkeerinninnissaq, suliffeqarfiit ataasiakkaat periarfissaannik inuiaqatigiillu iluanaarutigisinnaasaannik pilersitsiniarnernut ineriartuutaasinnaasunik.
Future Greenland 2009-mi suleqatigiinneq suleqatissarsiornerlu pingaarnerutillugit sammineqarput, tamatumani suliffeqarfiit akornanni suleqatigeeriaatsit assigiinngitsut suliffeqarfiit suliassanut annernut peqataasinnaanerannut qanoq iluaqutaasinnaanersut qitiutillugit sammineqarlutik, assersuutigalugu aatsitassarsiornermik ikummatissarsiornermillu suliaqartunut pilersuisutut suliassinneqarnissaq eqqarsaatigalugu. Maanna ukiut marluk missaanni qaangiuttullu suleqatigiillutik ingerlatseqatigiit siulliit takkuttalerput, suliffeqarfiimmi paasisimavaat immikkuutaarlutik suliassanik suliarinnikkumallutik nalunaartaraluarunik suliakkerneqarsinnaanaviaratik.
Future Greenland 2011-mi qulequttat CSR-imut tunngassuteqartut sammineqarput, tamatumi People, Planet and Profit pingaartillugit sammineqarlutik – tassa suliffeqarfiit inuiaqatigiinnut akisussaaqataallutik sulinerat suliassanik pilersaarusiornermut ilanngunneqarsinnaanersoq, taamaaliornerlu iluanaaruteqarluni sulinermut iluaqutaasinnaanersoq. 2010-mi ukiakkut Kalaallit Nunaanni Sulisitsisut Peqatigiiffiata misissuinerata takutippaa, CSR tunngavigalugu eqqarsartaaseq inuiaqatigiinnut kalaallinut tulluartuusoq, aammali misissuinerup takutippaa suliffeqarfippassuit ilisimanngikkaat periuseq ingerlatartik CSR tunngavigalugu sulinertut taaneqarsinnaasoq suliassanillu pilersaarusiornermut ilanngunneqarsinnaasoq, taamaalillunilu aamma suliffeqarfiup aningaasaqarneranut illuaqutaasinnaalluni. CSR tunngavigalugu sulineq suliffeqarfiit ilaasa pimoorullugu aallutilersimavaat – suliniaqatigiiffillu CSR Greenland pilersinneqarsimalluni, taamaaliornikkut CSR tunngavigalugu assigiinngitsutigut suliniuteqarneq ilisimasanik isumassarsiornermillu pissarsiviusinnaalluni.
Future Greenland 2013-imi pingaarnertut qulequtaritinneqassaaq 2030-mi tamatumalu kingorna siunissami ungasinnerusumi Kalaallit Nunaanni pisussatut takorluukkat. Ulluni marlunni ataatsimiinnermi pisussat saqqummiisussanillu qaaqqusinerit maannakkorpiaq suliarineqarput. Paasissutissat ukiup 2012-ip ingerlanerani ataavartumik tamanut saqqummiunneqartassapput.
FUTURE GREENLAND 2013-mut ilaatillugu Dansk Arkitektur Center-ip (DAC) Venedig-imi 2012-imi nunat tamalaat saqqummersitsineranni ”den 13. Internationale Arkitekturbiennale”-imi saqqummersitassaasa ilaat takutinneqassapput. Illussanik titartaasartut nunani tamalaaneersut saqqummersitsinissaanni Danmarkip peqataaleruni ”Future Greenland” saqqummersitaminut ilanngutissavaa – suliniummi tamatumani kalaallit danskillu illussanik titartaasartut Kalaallit Nunaanni siunissamut takorluukkatik suleqatigiillutik ineriartortissimavaat. Professor Minik Rosing suliamut illersuisuuvoq. Suliniut pillugu isumassarsiat eqqarsaatillu Future Greenland 2011-mi ataatsimiinnermi saqqummerput. Taamanili Venedig-imi 2012-imi saqqummersitsinissaq taamatuttaaq Nuummi 2013-imi pisussaq pillugu Kalaallit Nunaanni Sulisitsisut Peqatigiiffiata Arkitektur Center Dansk Arkitektur suleqatigilersimavaa.